Новости региона
3 июня 2019
У ЗАТ «Вялікія Славені» поўным ходам ідзе корманарыхтоўка
Здаўна касавіца была адным з самых адказных перыядаў для вяскоўцаў. «Ідуць касцы, звіняць іх косы», – са школьнай парты памятаем мы радкі Якуба Коласа. Зараз замест касцоў у белых кашулях працуе магутная тэхніка. Але напараўнальны водар свежаскошанай травы стаіць над сенажацямі гэтаксама, як і стагоддзі таму…
Ад таго, наколькі паспяхова пройдзе корманарыхтоўка, залежыць зімоўка буйнога рагатага ската, якасць і колькасць малочнай і мясной прадукцыі. Таму і стараюцца аграрыі, ловяць кожную пагожую хвілінку.
«Травамі мы задаволены, – расказвае галоўны аграном ЗАТ «Вялікія Славені» Руслан Краўцоў. – Надвор’е паспрыяла таму, каб яны добра наліліся. На першым перыядзе вясны, праўда, крыху не хапіла вільгаці, але потым сітуацыя выправілася. І як толькі наступіла найлепшая фаза для кашэння – пачатак бутанізацыі для бабовых, выкід мяцёлкі для злакавых – наша тэхніка выехала на лугі».
Бабова-злакавыя сумесі клевера, цімафееўкі, люцэрны вырошчваюць у ЗАТ «Вялікія Славені» для нарыхтоўкі сенажа, на сена –яжа, якая лічыцца самай ранняй кармавой культурай. На нарыхтоўцы кармоў задзейнічаны вопытныя механізатары: Уладзімір і Аляксандр Сафронавы, Святаслаў і Алег Панталёвы, Петр Сіманькоў, Уладзімір Катлоўскі і іншыя.
Уладзімір Сафронаў у гаспадарцы працуе амаль 20 год. На сваім трактары «Атлес-946» ён заняты на разнастайных работах. Зараз займаецца кашэннем. Высокая вытворчасць касілкі КПР-9 дазваляе працалюбіваму механізатару скошваць да 90 га ў дзень.
«У нашых планах нарыхтоўка 23 тысячы тон сенажа, 27 тысяч тон сіласа, 500 тон сена, – адзначае Руслан Краўцоў. – На сённяшні дзень працы ў самым разгары: па стану на 31 мая нарыхтавана 150 тон сена, 1111 тон сенажа, скошана 205 га мнагалетніх траў».
Як паведамілі нам ва ўпраўленні па сельскай гаспадарцы і харчаванню райвыканкама, на апошні майскі дзень у раёне нарыхтавана 14011 тон сенажа і 167 тон сена. Сярод перадавікоў корманарыхтоўкі – ААТ «Новагарадзішчанскае», ААТ «Александрыйскае», ЗАТ «Вялікія Славені».
