Рэспублiкi
23 студзеня 2017
У Беларусі ўстаноўлены новыя памеры штомесячных дыферэнцыраваных даплат да зарплаты бюджэтнікаў
23 студзеня, Мінск /Алена Прус - БЕЛТА/. У Беларусі ўстаноўлены новыя памеры штомесячных дыферэнцыраваных даплат да заработнай платы работнікаў бюджэтных арганізацый. Адпаведнае рашэнне змешчана ў пастанове Міністэрства працы і сацыяльнай абароны ад 11 студзеня 2017 года нумар 2, паведамілі карэспандэнту БЕЛТА ў профільным ведамстве.
Нагадаем, пастановай урада ад 30 снежня 2016 года нумар 1115 з 1 студзеня 2017 года павялічаны памер тарыфнай стаўкі першага разраду для разліку заработнай платы работнікаў бюджэтных арганізацый з Br29,8 да Br31, а таксама зменены дыяпазон і памеры штомесячных дыферэнцыраваных даплат для бюджэтнікаў.
Пастановай Мінпрацы і сацабароны ўстаноўлены наступныя памеры даплат: з 1-га да 6-га разраду - Br8,60; з 6-га да 10-га разраду - Br8; з 10-га да 12-га разраду - Br7,50; з 12-га да 13-га разраду - Br7; з 13-га да 14-га разраду - Br6,50; па 14-м разрадзе - Br5,70.
Як растлумачылі ў міністэрстве, штомесячныя дыферэнцыраваныя даплаты не ўтвараюць стаўку (аклад) і не ўлічваюцца пры вылічэнні прэмій, надбавак і іншых выплат стымулюючага і кампенсуючага характару.
Пастанова Мінпрацы і сацабароны нумар 2 уступае ў сілу пасля яе афіцыйнага апублікавання і распаўсюджвае сваё дзеянне на адносіны, што ўзніклі з 1 студзеня 2017 года.
Рэспубліканскім органам дзяржаўнага кіравання, мясцовым выканаўчым і распарадчым органам, кіраўнікам бюджэтных арганізацый неабходна забяспечыць з 1 студзеня 2017 года пераразлік заработнай платы работнікаў з улікам тарыфнай стаўкі першага разраду, каэфіцыентаў Адзінай тарыфнай сеткі работнікаў, карэкціруючых каэфіцыентаў, а таксама штомесячных дыферэнцыраваных даплат, новы дыяпазон якіх устаноўлены з 1 студзеня 2017 года.-0-
Навіны Беларусі