Рэспублiкi
У Беларусі прадоўжыцца работа па аптымізацыі кошту авіябілетаў
30 лістапада, Мінск /Кар. БЕЛТА/. У Беларусі ў 2017 годзе прадоўжыцца работа па аптымізацыі кошту авіябілетаў. Аб гэтым паведаміў сёння намеснік прэм'ер-міністра Анатоль Калінін на сумесным пасяджэнні палат Нацыянальнага сходу Беларусі, перадае карэспандэнт БЕЛТА.
"Прадоўжыцца аптымізацыя кошту авіябілетаў - гэта адна з прыярытэтных задач, пастаўленых грамадствам і ўрадам перад авіягаліной", - адзначыў Анатоль Калінін.
Акрамя таго, намеснік прэм'ер-міністра расказаў, што ў 2017-2020 гадах намаганні ўрада і авіяцыйнай галіны будуць таксама накіраваны на вырашэнне шэрага задач, сярод якіх прадаўжэнне будаўніцтва другой узлётна-пасадачнай паласы ў Нацыянальным аэрапорце Мінск. "У 2018 годзе мы плануем увесці гэты аб'ект. Акрамя таго, прадоўжыцца будаўніцтва сучаснага авіярамонтнага завода - першая чарга будзе ўведзена ў наступным годзе", - паведаміў ён.
Віцэ-прэм'ер падкрэсліў, што работу авіяцыйных арганізацый з эканамічнага пункту гледжання можна назваць паспяховай. На працягу апошняй пяцігодкі аб'ёмы перавезеных авіяцыйнымі арганізацыямі пасажыраў павялічваюцца на 20-30 працэнтаў штогод. "У пачатку лістапада галоўная паветраная гавань краіны абслужыла 3-мільённага пасажыра, што з'яўляецца знакавай падзеяй у гісторыі суверэннай Беларусі. Акрамя таго, апошнія гады сістэмна абнаўляецца паветраны парк "Белавія", з дзяржпадтрымкай набыты пяць новых самалётаў, апошні прыходзіць у снежні. Нацыянальны перавозчык за апошнюю пяцігодку адкрыў звыш 20 новых напрамкаў у рэгулярных зносінах", - паведаміў ён.-0-