Рэспублiкi

Сістэма аплаты працы ў бюджэтным сектары ў Беларусі з 1 студзеня 2019 года будзе перагледжана

2 лютага, Мінск /Кар. БЕЛТА/. Сістэма аплаты працы работнікаў бюджэтнага сектара эканомікі ў Беларусі з 1 студзеня 2019 года будзе перагледжана. Аб гэтым паведаміла сёння міністр працы і сацабароны Ірына Касцевіч на падагульняючай калегіі ведамства, перадае карэспандэнт БЕЛТА.

"У якасці канцэптуальных падыходаў да змянення аплаты працы прапануецца замяніць 27-разрадную адзіную тарыфную сетку (цяпер 8 пунктаў у ёй адпавядаюць рабочым прафесіям, астатнія - для спецыялістаў. - Заўвага БЕЛТА) на 17-разрадную сетку з размеркаваннем катэгорый работнікаў па прафесійна-кваліфікацыйных групах і тарыфных разрадах, замяніць тарыфную стаўку на базавую, яе памер будзе прыраўнаваны да бюджэту пражытачнага мінімуму, адмяніць шматлікія цэнтралізавана ўстаноўленыя выплаты, пашырыць правы кіраўнікоў дзяржорганаў і бюджэтных арганізацый па тарыфікацыі пасад з улікам галіновых асаблівасцей, размежаваць паўнамоцтвы дзяржорганаў і бюджэтных арганізацый у галіне аплаты працы", - растлумачыла Ірына Касцевіч.

З усяго гэтага трэба чакаць значнай карэкціроўкі заканадаўства. У лютым трэба будзе ўзгадніць адпаведныя ўказы кіраўніка дзяржавы і пастановы ўрада з усімі галіновымі міністэрствамі і прафсаюзамі і да 1 сакавіка ўнесці ва ўстаноўленым парадку ва ўрад.

"Паколькі пераход на новую сістэму аплаты працы бюджэтнікаў прадугледжваецца ажыццявіць да 1 студзеня 2019 года, работа ў такім напрамку будзе праводзіцца на працягу ўсяго бягучага года", - сказала Ірына Касцевіч.

Яна падкрэсліла, што забеспячэнне балансіроўкі з прадукцыйнасцю і павышэнне зарплаты ў бюджэтнай сферы з'яўляюцца аднымі з важнейшых напрамкаў работы міністэрства. "У 2017 годзе таксама быў прыняты шэраг нарматыўных прававых актаў, якія далі магчымасць павысіць зарплаты ў бюджэтным сектары - рэальны тэмп росту склаў больш за 104 працэнты. Мы некалькі разоў павышалі тарыфную стаўку першага разраду, закранулі нізкааплатныя катэгорыі: тых, хто аказвае сацпаслугі, працуе ў сферы культуры і па шэрагу іншых напрамкаў. У выніку прынятых мер суадносіны намінальнай зарплаты ў бюджэтнай сферы і зарплаты па краіне склалі 76 працэнтаў, задача 2018 года - павышэнне да 80 працэнтаў", - адзначыла Ірына Касцевіч.

Намінальная налічаная сярэдняя заработная плата бюджэтных арганізацый у студзені-снежні 2017 года склала Br618,7, у тым ліку ў снежні - Br769,4.-0-


Навіны Беларусі