Рэспублiкi

Беларусь займае трывалае месца ў сусветным працэсе асваення касмічнай прасторы - расійскі публіцыст

6 кастрычніка, Мінск /Кар. БЕЛТА/. Беларусь займае трывалае месца ў сусветным працэсе асваення касмічнай прасторы.Такое меркаванне выказаў расійскі публіцыст Аляксей Анпілогаў у аўтарскай калонцы на партале sonar2050.org, каменціруючы нядаўняе інтэрв'ю БЕЛТА старшыні Савета Рэспублікі Міхаіла Мясніковіча.

Беларусі ёсць што прапанаваць у якасці касмічных тэхналогій, упэўнены эксперт. "Так, беларускія інжынеры і вучоныя прымалі актыўны ўдзел у стварэнні бартавой апаратуры беларускага спадарожніка БКА, а будучы расійска-беларускі касмічны апарат дыстанцыйнага зандзіравання Зямлі РБКА будзе стварацца ў значнай меры самой Белруссю", - падкрэсліў ён. Здымачную апаратуру касмічнага апарата вырабяць беларускія прадпрыемствы, а стварэнне платформы і вывядзенне спадарожніка на арбіту забяспечыць расійскі "Раскосмас". Запуск новага спадарожніка па праграме Саюзнай дзяржавы запланаваны на канец 2020 года.

Першы беларускі спадарожнік, які быў выведзены на арбіту пяць гадоў таму, паспяхова працуе. Ён не толькі акупіў сябе поўнасцю, але і за тэрмін знаходжання на арбіце зарабіў дадатковыя $8 млн. "Тэрмін эксплуатацыі паспяховага апарата прадоўжаны ўжо Беларуссю папярэдне да канца наступнага года, і краіна вельмі актыўна фарсіруе стварэнне новага апарата РБКА на замену адыходзячаму БКА, які будзе дапрацоўваць свой рэсурс да канца", - сказаў эксперт.

Такім чынам, беларуская праграма даследавання касмічнай прасторы і дыстанцыйнага зандзіравання Зямлі ўжо мае трывалы эканамічны фундамент і знаходзіцца на самым перадавым тэхнічным узроўні, які адпавядае лепшым сусветным стандартам, падкрэсліў Аляксей Анпілогаў. Так, БКА нясе на борце выключна беларускую аптычную апаратуру, якая і робіць здымкі з космасу з распазнаваннем 2 метры (на ўзроўні большасці сусветных аналагаў). "Стварэнне тапаграфічных карт, меліярацыя, выяўленне зон пажараў, паводкі, незаконных высечак - усе гэтыя надзённыя задачы, актуальныя для беларускай эканомікі, прамысловасці, сельскай гаспадаркі і грамадскага жыцця, сёння паспяхова вырашаюцца з дапамогай БКА. І робіцца гэта з тым самым станоўчым эканамічным рэзультатам, аб якім так фальшыва клапоцяцца крытыкі беларускай касмічнай праграмы", - адзначыў ён.

На думку Аляксея Анпілогава, "Беларусь займае трывалае месца ў сусветным працэсе асваення касмічнай прасторы. "Беларускі космас" не толькі мае права на жыццё, але і ўжо адстаяў яго ў жорсткай канкурэнтнай барацьбе на сусветным рынку". "Пры гэтым мары Беларусі аб уласным пілатуемым космасе зусім будзённа стаяць на трывалым фундаменце сучаснасці. Фактычна сёння размова ідзе аб тым, што пілатуемыя касмічныя амбіцыі Беларусі ў поўнай меры могуць быць ажыццёўлены ў праграме стварэння новага пілатуемага расійскага касмічнага апарата, які менавіта цяпер вырабляецца па праграме "Раскосмасу" на замену адыходзячаму ў мінулае "Саюзу", на якім ляталі і Клімук, і Навіцкі", - лічыць ён.

"І тут зноў-такі няма ніякай фантастыкі. Паступовая, этапная работа ў рамках касмічных праграм Саюзнай дзяржавы можа стварыць для Беларусі тую самую рэальнасць, у якой без усялякай нацяжкі беларусы могуць атрымаць дастойнае месца ў пілатуемай касмічнай праграме. У цэлым жа космас для Саюзнай дзяржавы, разам з атамнай энергетыкай, сумеснымі праектамі ў галіне машынабудавання і іншымі, трэба расцэньваць як пляцоўку для пераходу да новага ўзроўню адносін", - рэзюмаваў эксперт.-0-


Навіны Беларусі