Рэспублiкi
10 лістапада 2016
Беларусь у Жэневе заклікала ўмацоўваць намаганні па раззбраенні і нераспаўсюджванні
10 лістапада, Мінск /Кар. БЕЛТА/. Беларуская дэлегацыя на чале з намеснікам начальніка ўпраўлення міжнароднай бяспекі і кантролю над узбраеннямі Міністэрства замежных спраў Мікалаем Аўсянкам прымае ўдзел у рабоце 8-й агляднай канферэнцыі Канвенцыі аб забароне біялагічнай і таксічнай зброі (КБТЗ), якая праходзіць у Жэневе. Аб гэтым БЕЛТА паведамілі ў прэс-службе знешнепалітычнага ведамства.
У ходзе агульнай дыскусіі дэлегацыя Беларусі ў якасці старшынствуючай у АДКБ краіны выступіла з заклікам да дзяржаў - удзельніц КБТЗ прадоўжыць сумесныя намаганні па ўмацаванні канвенцыі на надзейнай юрыдычна абавязковай аснове.
Мікалай Аўсянка падкрэсліў, што КБТЗ з'яўляецца асноватворным інструментам у галіне міжнароднай бяспекі, раззбраення і нераспаўсюджвання.
Прадстаўнік Беларусі заклікаў дзяржавы - удзельніцы КБТЗ прыняць меры, каб адказаць на выклікі, звязаныя з хуткім прагрэсам у навуцы і тэхніцы, процідзеяннем траплянню біялагічных агентаў у рукі недзяржаўных фарміраванняў. Дзяржавы былі праінфармаваны аб мерах, што прымаюцца Беларуссю па ўдасканаленні нацыянальнага заканадаўства, выкананні рэзалюцыі СБ ААН 1540, а таксама аб існуючым патэнцыяле і распрацоўках у галіне біябяспекі.
8-я аглядная канферэнцыя КБТЗ прадоўжыцца да 25 лістапада.-0-