Рэгiёна
У Мінлясгасе заклікалі не наведваць лясы да пачатку дажджоў
Першы намеснік міністра лясной гаспадаркі Аляксандр Драгун заклікаў беларусаў не наведваць лясы да пачатку дажджоў. Аб гэтым карэспандэнту БЕЛТА паведамілі ў прэс-службе ведамства.
Цяпер у Беларусі вельмі неспрыяльныя ўмовы надвор'я для пажарнай бяспекі лясных угоддзяў. Толькі за апошнія суткі работнікі дзяржлесаховы сумесна з МНС ліквідавалі больш за 11 узгаранняў у экасістэмах. Уведзены забароны на наведванне лясоў на ўсёй тэрыторыі Беларусі, за выключэннем Браслаўскага раёна. "Тым не менш грамадзяне прадаўжаюць наведваць лясы для збору грыбоў, адпачынку на прыродзе і іншага, з-за чаго адбываюцца ўзгаранні. Недзе яны могуць быць выпадковымі, аднак работнікамі дзяржлесаховы выяўляюцца выпадкі наўмысных падпалаў. Так, у адным з лясных кварталаў Ляхавіцкага раёна адбылося ўзгаранне адначасова ў пяці кропках, што, безумоўна, указвае на чалавечы фактар", - сказаў прадстаўнік Мінлясгаса.
Першы намеснік міністра дадаў, што з-за гарачыні ў лясах няма грыбоў, а ўраджай ягад у гэтым годзе вельмі слабы. Таму грамадзянам Беларусі трэба ўстрымацца ад наведвання лясоў у гэтыя выхадныя. Аляксандр Драгун падкрэсліў, што пажаранебяспечная сітуацыя зменіцца з пачаткам дажджоў.
За парушэнне правіл пажарнай бяспекі ў лясах, у тым ліку забароны на наведванне, устаноўлена адміністрацыйная адказнасць - штраф да 12 базавых велічынь, а ў выпадку цяжкіх наступстваў для фонду - да 30 базавых велічынь. Калі ў выніку неасцярожнага абыходжання з агнём або наўмыснага падпалу будзе нанесены ўрон у вялікім або асабліва вялікім памеры, то прадугледжваецца крымінальная адказнасць - да двух гадоў пазбаўлення волі.-0-