Рэгiёна
Мастацкі арт-праект "Клумбавосень" стартуе ў Магілёве
Мастацкі арт-праект "Клумбавосень" адкрыецца 16 лістапада ў выставачнай зале Музея гісторыі Магілёва. Аб гэтым карэспандэнту БЕЛТА расказалі ва ўстанове культуры.
Аўтарам экспазіцыі выступіла мастачка Музея гісторыі Магілёва, член Беларускага саюза мастакоў Марына Несцярук. На выставе прадстаўлена каля 60 яе жывапісных твораў, напоўненых энергіяй і радасцю жыцця. Асноўныя і любімыя жанры - нацюрморт і пейзаж. Творы мастачкі дазваляюць убачыць і адчуць прыгажосць, дасканаласць і гармонію прыроды.
"Кожная работа мастака - гімн хараству навакольнага свету, - расказалі ў музеі. - У яе карцінах уражвае цеплыня і сугучча фарбаў, якія на палотнах ператвараюцца ў шматкаляровыя пялёсткі і букеты. Яны прымушаюць забыць аб тым, што ўсё прадстаўленае ў творы - эмацыянальнае бачанне мастачкі, якое яна таленавіта перадае гледачу".
Акрамя жывапісу Марына Несцярук праяўляе сябе ў розных відах творчасці - напрыклад, манументальна-дэкаратыўная размалёўка і ткацтва. Яна выступіла аўтарам выкананых у тэхніцы ручнога ткацтва габеленаў, размешчаных у экспазіцыі ўстановы культуры, а таксама касцюмаў эпохі Магдэбургскага права.
Яркі і пазітыўны творчы праект будзе радаваць магіляўчан і гасцей горада да 18 снежня.-0-