Рэгiёна
Бельскі: інфармацыйныя сустрэчы аднолькава карысныя для грамадзян і спікераў
Інфармацыйныя сустрэчы аднолькава карысныя як для грамадзян, так і спікераў. Такім меркаваннем з журналістамі падзяліўся намеснік старшыні Савета Рэспублікі Валерый Бельскі па выніках сустрэчы з калектывам ААТ "Кіруючая кампанія холдынга "Магілёўводбуд", перадае карэспандэнт БЕЛТА.
"Для сустрэч з насельніцтвам, для правядзення Адзіных дзён інфармавання праводзіцца глыбокая падрыхтоўчая работа. Мэтанакіравана збіраецца сістэмная інфармацыя, якую часам непадрыхтаванаму чалавеку цяжка атрымаць з-за разнастайнасці крыніц. Праводзіцца работа па фарміраванні цэлага інфармацыйнага блока, - адзначыў ён. - Гэта работа важная і карысная не толькі для нашых грамадзян, але і людзей, якія прафесійна гэтым займаюцца".
Падрыхтоўка да такіх мерапрыемстваў дае магчымасць атрымліваць новую інфармацыю. Так, Валерый Бельскі падзяліўся, што асабіста для яго было цікава даведацца аб партызанскім руху на тэрыторыі Заходняй Беларусі ў перыяд 1922-1939 гадоў.
У час размовы з калектывамі важна правільна выбіраць фармат узаемадзеяння. "Я стараюся нейкія сур'ёзныя факты, высновы ілюстраваць прыкладамі, блізкімі кожнаму чалавеку. З сям'і, абапіраючыся на ўласны вопыт. Такія факты запамінаюцца лепш і збліжаюць, няма ніякага разрыву, каставасці ўлады. У прадстаўнікоў улады тыя ж самыя праблемы, тыя ж самыя задачы. Таму гэта таксама важна - яднанне ўлады і народа", - адзначыў ён.
Яшчэ адзін важны момант - зваротная сувязь. "Сёння не, а часцей за ўсё бываюць пытанні з залы, якія прымушаюць задумацца і атрымаць зваротную інфармацыю і ўлічваць яе ў заканатворчай дзейнасці, - адзначыў Валерый Бельскі. - Якраз пад гэту сесію Наталля Іванаўна (Качанава. - Заўвага БЕЛТА) усім сенатарам давала даручэнне: разглядаючы звароты грамадзян, сустракаючыся з калектывамі, атрымліваць інфармацыю аб сістэмных праблемных пытаннях для далейшага заканадаўчага ўрэгулявання. Такая зацікаўленая работа асабліва важна напярэдадні новай выбарчай кампаніі, якая пачынаецца ўжо ў Беларусі паступова. Мы на ўваходзе ў новы электаральны цыкл і павінны сваю жыццяздольнасць даказваць".
Таксама работа на месцах дае магчымасць убачыць людзей, даведацца пра іх праблемы, а таксама пажурыць кіраўніцтва, калі ёсць за што, падкрэсліў Валерый Бельскі. Атрыманая ў час такіх сустрэч інфармацыя карысна для ўсіх. "Для нас, заканадаўцаў, для калектываў. Інфармацыйная работа дае магчымасць сістэмна ўкласці ў нейкую канцэпцыю, строгую, навукова абгрунтаваную, тыя факты нашага звычайнага жыцця, якія прысутнічаюць у жыцці кожнага з нас", - рэзюмаваў намеснік старшыні.
Як расказаў дырэктар холдынга Павел Найдзён, на прадпрыемстве працуе каля 600 чалавек. "У холдынг уваходзіць 13 арганізацый практычна па ўсёй вобласці. Мы займаемся ў асноўным меліярацыйным будаўніцтвам, пачынаючы ад будоўляў на меліярацыйных аб'ектах і заканчваючы новым асушэннем. Таксама на дагаворных умовах будаўніцтвам якіх-небудзь аб'ектаў на прадпрыемствах або ў горадзе. На сённяшні дзень аб'ём меліярацыйных работ па холдынгу складае 78 працэнтаў, астатняя частка - работы, якія мы выконваем па дагаворных абавязацельствах", - адзначыў дырэктар.
Практычна ў кожным раёне ў нас ёсць буйныя аб'екты. "Калі гаварыць пра меліярацыйнае будаўніцтва - гэта больш чым па 200 га тых зямель, якія былі забалочаны, і на сённяшні дзень яны прыведзены ў сельскагаспадарчы абарот і даюць нядрэнны ўраджай", - сказаў Павел Найдзён.
Кіраўнік холдынга таксама падкрэсліў значнасць такіх інфармацыйных сустрэч. "Яны дапамагаюць з першых вуснаў даведацца аб тым, што на сённяшні дзень адбываецца ў Беларусі і які вектар накіраванасці сёння выбраны нашай дзяржавай і Прэзідэнтам нашай краіны. Такія сустрэчы неабходны асабліва перад будучымі выбарамі ў 2024 годзе. Гэта будзе яшчэ адзін пункт, які накіруе і арганізуе розум, сфарміруе стаўленне людзей у пытаннях таго, што напрамак, выбраны Прэзідэнтам і нашым народам, правільны", - падкрэсліў ён.-0-