Рэгiёна

13 кастрычніка, Мінск /Кар. БЕЛТА/. Беларускі дзіцячы фонд традыцыйна далучаецца да святкавання Дня маці. У першую чаргу павіншуюць маці, якія выхоўваюць дзяцей-сірот, дзяцей з інваліднасцю, хворых дзяцей, і шматдзетных маці, паведамілі карэспандэнту БЕЛТА ў фондзе.

Так, Цэнтральны офіс Беларускага дзіцячага фонду правядзе для маці-выхавальнікаў дзіцячых дамоў сямейнага тыпу Мінска і Мінскай вобласці майстар-клас па выпечцы класічных булачак сінабон. Абласныя аддзяленні арганізуюць урачыстасці, конкурсы, святы, прысвечаныя маці.

"У Брэсцкай вобласці адбудзецца марафон "Маці - даўжынёй у жыццё", які дасць магчымасць расказаць аб сем'ях, дзе выхоўваюцца дзеці-інваліды. Прыняць удзел у ім змогуць усе жадаючыя, каб падзяліцца гісторыяй аб такой маці. Дарэчы, усе гэтыя гісторыі будуць размешчаны на старонцы Брэсцкага абласнога аддзялення фонду ў сацыяльных сетках. У Віцебскай вобласці ўжо адбылося традыцыйнае свята "Дзень дабра і прыгажосці". Шматдзетныя маці, а таксама тыя, хто выхоўваюць дзяцей-сірот, інвалідаў былі запрошаны ў салон прыгажосці, а потым разам з дзецьмі адправіліся на спектакль у тэатр "Лялька", - адзначылі ў дзіцячым фондзе. - Гомельскае абласное аддзяленне для шматдзетнай маці з Добруша і ўсёй яе сям'і арганізавала цэлы святочны дзень. Маці, бацька і 5 дачок прыехалі ў Гомель, наведалі новы паказ у цырку, пагулялі па горадзе, парку. Не абышлося і без падарункаў - сям'і ўручылі салодкія падарункі, настольныя гульні і цацкі".

У Мінскай вобласці праходзіць акцыя "Робім для маці добрыя справы" для шматдзетных і выхавальнікаў дзіцячых дамоў сямейнага тыпу. Іх чакаюць ушаноўванні, конкурсы, святочныя канцэрты і, вядома, падарункі.

Маці-выхавальнікі дзіцячых дамоў сямейнага тыпу Гродзенскага рэгіёна таксама не застануцца без падарункаў да свята. У Магілёве 14 кастрычніка запросяць на свята 25 маці, якія выхоўваюць дзяцей з цяжкімі формамі інваліднасці. Для іх валанцёры фонду падрыхтавалі канцэртную праграму, а для дзяцей - гульні і забавы. Акрамя таго, дзіцячы фонд уручыць кожнай маці кандытарскія салодкія наборы.-0-