Варанюк: грамадскія арганізацыі Беларусі адзіныя ў сваім парыве захоўваць гістарычную памяць

Грамадскія арганізацыі Беларусі адзіныя ў сваім парыве захоўваць гістарычную памяць, заявіў журналістам першы сакратар Цэнтральнага камітэта БРСМ, член Савета Рэспублікі Дзмітрый Варанюк, паведамляе карэспандэнт БЕЛТА.

Сёння ў храме-помніку ў гонар Усіх Святых і ў памяць аб ахвярах, якія выратаванню Айчыны нашай паслужылі, у Мінску прайшла цырымонія падпісання мемарандума паміж грамадскімі арганізацыямі Беларусі патрыятычнай накіраванасці. Дакумент падпісалі Беларускі рэспубліканскі саюз моладзі, Федэрацыя прафсаюзаў Беларусі, “Белая Русь”, Беларускі саюз жанчын, Беларускае грамадскае аб’яднанне ветэранаў, Беларускі фонд міру, "Патрыёты Беларусі", Беларускі саюз афіцэраў, Беларускі саюз ветэранаў вайны ў Афганістане і Беларускі камітэт маладзёжных арганізацый. 

"Сёння важнейшы дзень для грамадскіх аб'яднанняў Беларусі, таму што мы ў дзень памяці ахвяр Хатыні і тысяч вёсак, спаленых фашыстамі ў гады вайны, заяўляем усяму грамадству і, магчыма, усяму свету, што як ніколі грамадзянская супольнасць Беларусі моцная, як ніколі мы адзіныя, і сёння гэтым мемарандумам мы хочам зрабіць пэўны пасыл. Мы хочам сказаць, што грамадскія арганізацыі адзіныя ў сваім парыве стаяць на варце захавання памяці пра гераічнае мінулае нашага народа. Мы хочам сказаць, што мы адзіныя ў нашых пасылах і рэалізацыі праектаў, якія накіраваны на грамадзянска-патрыятычнае выхаванне насельніцтва, на стварэнне і, самае галоўнае, на прадаўжэнне будаўніцтва нашай суверэннай, незалежнай Беларусі", - сказаў Дзмітрый Варанюк.

Першы сакратар ЦК БРСМ заклікаў грамадзян Беларусі прыйсці і пакланіцца памятным мясцінам і мемарыялам з кветкамі, каб выказаць сваю падзяку тым, хто падарыў нам мірнае неба над галавой. "Мы даём пасыл усім грамадзянам Беларусі, якія сёння сядзяць у чатах, сочаць за СМІ: уставайце са сваіх канап, купляйце кветкі і станьце на калені ля велічных помнікаў, якія ёсць у кожнай кропцы нашай краіны. Успомніце пра тых герояў, дзякуючы якім мы сёння дыхаем і жывём пад мірным небам і, самае галоўнае, трэба, каб кожны разумеў - усё, што мы сёння робім, павінна несці стварэнне, дабро і развіццё. Толькі тады мы зможам прадаўжаць разам будаваць нашу любімую Беларусь. І, вядома, мы, грамадскія арганізацыі, сёння, аб'ядноўваючыся ў моцную скрэпу дружбы, узаемаразумення, заручаючыся падтрымкай адзін аднаго, прадоўжым сваю канструктыўную працу на карысць Беларусі", - сказаў на заканчэнне ён.

"Рухаючыся ў адным напрамку, прыкладаючы сумесна намаганні, мы дасягнём лепшага выніку. І 22 сакавіка, у гэты сумны і трагічны дзень, мы хочам нагадаць гэтым мемарандумам, што трэба шанаваць сваю гісторыю і памяць свайго народа", - сказаў старшыня рэспубліканскага грамадскага аб'яднання "Патрыёты Беларусі" Сяргей Рачкоўскі.

Намеснік старшыні Федэрацыі прафсаюзаў Беларусі Алена Манкевіч падкрэсліла, што сёння грамадскія аб'яднанні краіны падпісалі мемарандум аб адзінстве. "Людзям трэба аб'ядноўвацца ў імя будучыні, у імя дабра, любві і памяці. Мы не павінны забываць, хто мы ёсць і чаму мы з'явіліся на гэтай зямлі, - адзначыла яна. - У маёй сям'і не вярнуўся з вайны ніводны з маіх дзядоў. Мае сыны пра гэта помняць і ведаюць. Мне вельмі хацелася б, каб пра гэта помнілі і мае ўнукі".

 

"Год народнага адзінства для БСЖ не проста словы. І пачалі мы з самага галоўнага - адзінства ў сям'і", - дадала старшыня Беларускага саюза жанчын, першы намеснік міністра аховы здароўя Алена Богдан. - Падпісанне мемарандума, з аднаго боку, гэта такі фармалізаваны крок аб'яднання намаганняў для таго, каб паказаць, што за адным сталом сёння збіраюцца абсалютна розныя грамадскія арганізацыі, якія кансалідуюць нашу грамадзянскую супольнасць. А з другога боку, за гэтым мемарандумам следам  пройдзе шэраг мерапрыемстваў, што дасць магчымасць аб'яднаць як мага больш людзей у Год народнага адзінства".

З ініцыятывай кансалідаваць намаганні ў Год народнага адзінства выступіў Беларускі рэспубліканскі саюз моладзі на VIII Пленуме Цэнтральнага камітэта БРСМ. Пагадненне нацэлена на сумесную рэалізацыю ў 2021 годзе праектаў па з’яднанні беларускага народа на аснове ідэй суверэнітэту і незалежнасці краіны, захаванне і папулярызацыю традыцый, спадчыны і гістарычнай памяці, фарміраванне паважлівага стаўлення да дзяржаўных сімвалаў Беларусі, умацаванне міжканфесійнага міру і міжнацыянальнай згоды.

Цырымонія падпісання мемарандума прайшла ў час адкрытага дыялогу "Беларусь: учора, сёння, заўтра". Эксперты абмяркоўваюць надзённыя праблемы - захаванне праўды аб Вялікай Айчыннай вайне і супрацьстаянне спробам фальсіфікацыі яе гісторыі, а таксама пашырэнне канструктыўнага дыялогу ў беларускім грамадстве і ўключэнне ў яго розных катэгорый насельніцтва.-0-