Рэгiёна
Клімавічы гасцінна сустракаюць абласны фестываль-кірмаш працаўнікоў вёскі "Дажынкі"
Ушаноўванне аграрыяў, святочныя канцэрты, горад майстроў, гандлёвыя рады і фудкорты - 16 лістапада Клімавічы гасцінна прымаюць абласны фестываль-кірмаш працаўнікоў вёскі "Дажынкі", перадае карэспандэнт БЕЛТА.
Да важнай падзеі раённы цэнтр рыхтаваўся загадзя: літаральна за некалькі месяцаў горад змяніўся да непазнавальнасці - абноўлены вуліцы і фасады дамоў, адрамантаваны важныя культурныя і сацыяльныя аб'екты. "Прымаць фестываль-кірмаш працаўнікоў вёскі "Дажынкі" - вялікі гонар і вялікая адказнасць, - падкрэсліў начальнік аддзела ідэалагічнай работы і па справах моладзі Клімавіцкага райвыканкама Андрэй Зяньковіч. - Напярэдадні свята праведзена каласальная работа, да якой падключыўся ўвесь рэгіён, бо ў еднасці - наша сіла. Упэўнены, "Дажынкі" нададуць новы імпульс развіццю горада і раёна".
Андрэй Зяньковіч адзначыў, што напярэдадні свята інфраструктура райцэнтра значна змянілася. Сярод самых адметных змяненняў, якія сёння змогуць ацаніць госці свята, - рэканструкцыя раённага Дома культуры і краязнаўчага музея, капітальны рамонт цэнтральнай вуліцы Камуністычнай, добраўпарадкаванне парка Народнага адзінства, касметычны рамонт аб'ектаў гандлю, гарадскога стадыёна, аграрнага каледжа, капрамонт дамоў і асфальтаванне дарог, устаноўка дзіцячых гульнявых пляцовак, стварэнне зоны адпачынку на р.Калініца, адкрыццё плошчы Фестывальнай, дзе ў далейшым будзе праводзіцца міжнародны фестываль дзіцячай творчасці "Залатая пчолка".
Праграма "Дажынак" у Клімавічах абяцае быць насычанай, яркай, смачнай і музычнай. Традыцыйна на свяце адзначаць аграрыяў і пераможцаў абласнога спаборніцтва за дасягненне высокіх паказчыкаў на ўборцы ўраджаю збожжавых і зернебабовых. Ім уручаць падзякі, ганаровыя граматы, узнагароды і каштоўныя падарункі, скажуць са сцэны шмат добрых слоў, падораць музычныя нумары. Галоўнай тэмай выступленняў стане ўслаўленне чалавека працы, які вырасціў хлеб новага ўраджаю і зрабіў істотны ўклад у харчовую бяспеку краіны.
Асобная ўвага - рабоце тэматычных пляцовак і гандлёвых радоў. Так, у фестывалі-кірмашы прымаюць удзел буйнейшыя вытворцы рэгіёна, прадпрыемствы спажыўкааперацыі, прыватныя фірмы і індывідуальныя прадпрымальнікі. Агульная працягласць гандлёвых радоў складае амаль 600 м, а колькасць пасадачных месцаў - больш як 500. Гандаль і грамадскае харчаванне размясціліся на некалькіх вуліцах райцэнтра. Тут прадстаўлена мясная прадукцыя, розныя віды каўбас і паўфабрыкатаў, хлебабулачныя і кулінарныя вырабы, а таксама гатовыя стравы. Прыярытэтным напрамкам абслугоўвання наведвальнікаў стала прыгатаванне ежы так, што ўсе бачаць гэты працэс - арганізаваны зоны-грыль з устаноўкай мангалаў, печаў-казаноў і ражноў.
Майстры і ўмельцы прапануюць пакупнікам сувеніры, вагавую гарбату, спецыі, біжутэрыю, вырабы з дрэва і шмат іншага. "Фестываль-кірмаш "Дажынкі" традыцыйна становіцца галоўным сельскагаспадарчым святам у рэгіёне, - адзначыла намеснік начальніка галоўнага ўпраўлення гандлю і паслуг Магілёўскага аблвыканкама Вераніка Цітова. - Добры настрой і святочную атмасферу тут ствараюць не толькі работнікі культуры, але і прадстаўнікі гандлю: увазе гасцей мерапрыемства прапанаваны шырокі асартымент прадукцыі - усё тое, чым багата магілёўская зямля".
Часткай свята стане выстава сельгастэхнікі, кірмаш "Млын ураджаю", на якім прадстаўлена сельскагаспадарчая прадукцыя рэгіянальных прадпрыемстваў, прэзентацыя аграпрамысловага патэнцыялу і поспехаў рэгіёна, а таксама дэманстрацыя турыстычных, культурных і прамысловых брэндаў Магілёўшчыны. Таксама ў Клімавічах арганізавана прафарыентацыйная пляцоўка ўстаноў сярэдняй спецыяльнай адукацыі з візіткай і профільнымі майстар-класамі.
Лакацыя ўстаноў дадатковай адукацыі дзяцей і моладзі прапануе наведвальнікам квесты, палатачны гарадок, спартыўна-гульнявыя кропкі, выставы, фотазоны, майстар-класы па дэкаратыўна-прыкладным мастацтве. Тут таксама можна азнаёміцца з пляцоўкай дзіцяча-юнацкіх спартыўных школ і цэнтраў фізкультурна-аздараўленчай работы, выставамі студатрадаўскага руху і інтэрактывамі ад абласнога камітэта БРСМ.
Паказальныя выступленні і тэматычныя лакацыі падрыхтавалі для гасцей свята прадстаўнікі МНС і Дэпартамента аховы. Акрамя таго, гасцей запросяць у Клімавіцкі раённы краязнаўчы музей на выставу фатаграфій "Соль зямлі Магілёўскай", прысвечаная ўборачнай кампаніі 2024 года.
Завершыцца абласны фестываль-кірмаш працаўнікоў вёскі "Дажынкі" святочным феерверкам.-0-