Касцевіч: у Беларусі за пяць гадоў стала ў два разы больш валанцёраў сярэбранага ўзросту
За апошнія пяць гадоў у Беларусі ў два разы павялічылася колькасць валанцёраў сярэбранага ўзросту. Аб гэтым журналістам расказала міністр працы і сацыяльнай абароны Ірына Касцевіч у час ІІ Рэспубліканскага злёту "сярэбраных" валанцёраў, які сёння праходзіць у Магілёве, перадае карэспандэнт БЕЛТА.
"Мы стартавалі ў 2019 годзе і правялі першы злёт. Тады па ўсёй Беларусі было ўсяго 2 тыс. валанцёраў сярэбранага ўзросту. Мы ўбачылі водгук ад пажылых людзей, вялікую цікавасць да гэтага напрамку. Вядома, у валанцёрскім руху больш моладзі. І калі далучыліся людзі элегантнага ўзросту да гэтага руху, мы паставілі сабе задачу максімальна развіваць гэты рух, - расказала яна. - У 2020 годзе была прынята нацыянальная стратэгія "Актыўнае даўгалецце", і адзін з напрамкаў - гэта якраз развіццё валанцёрскага руху. І па факце мы сёння маем каманду валанцёраў пажылога ўзросту, якая павялічылася амаль у два разы".
Паводле слоў міністра, ёсць вялікая колькасць напрамкаў, у якіх сябе праяўляюць такія валанцёры. "Гэта гуртковая работа, дзе нашы валанцёры, зыходзячы са свайго прафесіяналізму, дзеляцца ім, вучаць спевам, танцам, вязанню, замежным мовам. Напрамкаў шмат, дзе яны ў якасці валанцёраў выкладаюць такім жа людзям, як самі. Яшчэ адзін цікавы напрамак - творчыя калектывы. На пенсіі яны пачалі спяваць, танцаваць, сталі пісаць вершы, музыку і песні, - падзялілася яна. - Валанцёры сярэбранага ўзросту патраніруюць сем'і, дзе выхоўваюцца дзеці-інваліды, яны дапамагаюць людзям, у якіх ёсць сур'ёзныя праблемы са здароўем, інвалідам. І тут атрымліваецца, што роўны дапамагае роўнаму. Гэты напрамак таксама набірае абароты".
Валанцёрскі рух - гэта важны элемент развіцця грамадства. "Калі чалавек бязвыплатна, не важна, колькі яму гадоў, можа падарыць любоў, дабрату, цяпло чалавеку, часам абсалютна не знаёмаму, - гэта вельмі важна. Гэта дапамагае зусім інакш адчуваць сябе самому валанцёру, а самае галоўнае - акружыць дабратой, зарадзіць усіх тых, хто знаходзіцца побач з ім. На першым злёце ў Мінску мы ўбачылі гэту пазітыўную энергетыку і жаданне актыўных людзей пажылога ўзросту развівацца далей. Ёсць розныя праекты, якія заслугоўваюць увагі і якія трэба тыражыраваць на ўсю краіну", - падзялілася яна.
У Беларусі на сённяшні дзень пражывае 1,5 млн чалавек ва ўзросце 65+. "Каманда пажылых людзей - сур'ёзная сіла. І наша задача - максімальна выцягнуць іх з кватэр, дамоў, каб яны ішлі на танцпляцоўкі, каб яны спявалі, каб яны размаўлялі. Усе канцэрты, вялікія і малыя пляцоўкі - гэта таксама нашы валанцёры. Я бачу людзей, якія глядзяць на іх. І гэта энергетыка дае магчымасць астатнім людзям задумацца аб тым, што жыццё прадаўжаецца. І якое яно будзе - залежыць ад кожнага з нас", - падкрэсліла Ірына Касцевіч.
Развіццё валанцёрскага руху ў краіне набірае абароты, але існуючыя вынікі - гэта не мяжа, упэўнена міністр. "На злёце кожны рэгіён прадставіць свае праекты. Мэта - паказаць новае. І гэта новае павінна быць не толькі ў тым рэгіёне, дзе зарадзілася, але і максімальна ісці па ўсёй краіне".
Сёння ў Магілёў прыехалі каля 160 валанцёраў сярэбранага ўзросту з усіх рэгіёнаў краіны.-0-